10 Jul

ഹോസ്റ്റലുമായി ഒളവണ്ണ വനിതാ സഹകരണ സംഘവും

ഹോസ്റ്റലുമായി ഒളവണ്ണ വനിതാ സഹകരണ സംഘവും

(2020 ജൂണ്‍ ലക്കം)

അഞ്ജു വി.ആര്‍

കോഴിക്കോട്ട് സഹകരണ മേഖലയില്‍ രണ്ടാമതൊരു വനിതാ ഹോസ്റ്റല്‍ കൂടി തുറക്കുകയാണ്. ഒളവണ്ണ വനിതാ സഹകരണ സംഘമാണ് അഞ്ചു നിലയുള്ള ഹോസ്റ്റല്‍ പണിയുന്നത്

ജോലി ചെയ്യുന്ന സ്ത്രീകളുടെ താമസ പ്രശ്‌നം പരിഹരിക്കാനായി കോഴിക്കോട്ട് ഇതാ സഹകരണ മേഖലയിലെ രണ്ടാമത്തെ വര്‍ക്കിങ് വിമന്‍സ് ഹോസ്റ്റലുമായി മറ്റൊരു വനിതാ സഹകരണ സംഘം. ഒളവണ്ണ വനിതാ സഹകരണ സംഘം തുടങ്ങുന്ന വനിതാ ഹോസ്റ്റലിന്റെ നിര്‍മാണം അവസാനഘട്ടത്തിലെത്തിക്കഴിഞ്ഞു. സിറ്റി വനിതാ സഹകരണ സംഘമാണ് കോഴിക്കോട്ട് വര്‍ക്കിങ് വിമന്‍സ് ഹോസ്റ്റല്‍ രംഗത്തേക്കു കടന്ന ആദ്യത്തെ സഹകരണ സംഘം. ഇവരുടെ ഹോസ്റ്റല്‍ ചാലപ്പുറത്ത് വിജയകരമായി പ്രവര്‍ത്തിച്ചു വരികയാണ്.

18 വര്‍ഷത്തെ അനുഭവം

ക്രെഡിറ്റ് മേഖലയില്‍ മാത്രമാണ് ഇപ്പോള്‍ ഒളവണ്ണ വനിതാ കോ-ഓപ്പറേറ്റീവ് സൊസൈറ്റി പ്രവര്‍ത്തിക്കുന്നത്. സിറ്റി വനിതാ സംഘത്തിന്റെ ചുവടു പിടിച്ച് ഒളവണ്ണ സംഘവും വര്‍ക്കിങ് വിമന്‍സ് ഹോസ്റ്റല്‍ രംഗത്തേക്കു കടക്കുകയാണ്. 18 വര്‍ഷത്തെ അനുഭവ സമ്പത്താണ് പുതിയൊരു മേഖലയില്‍ ഒരു കൈ നോക്കാന്‍ ഈ സംഘത്തെ പ്രേരിപ്പിച്ചത്. ഫ്‌ളോറിങ്, ചുറ്റുമതില്‍ കെട്ടല്‍, പെയിന്റിംഗ് എന്നീ പണികള്‍ മാത്രമാണ് ബാക്കി. മാങ്കാവ് ബൈപ്പാസിന്റെ അടുത്താണ് ഹോസ്റ്റല്‍. ക്രെഡിറ്റ് മേഖലയില്‍ നിന്ന് ഇനി സംഘത്തിന് ഒന്നും നേടാന്‍ ബാക്കിയില്ല എന്ന തിരിച്ചറിവില്‍ നിന്നാണ് ഹോസ്റ്റല്‍ എന്ന ആശയവുമായി മുന്നോട്ടു പോകുന്നതെന്ന് സംഘം പ്രസിഡന്റ് ജലജ പറഞ്ഞു.

എം.വി. രാഘവന്‍ സഹകരണ മന്ത്രിയായിരുന്ന കാലത്ത് കേരളത്തില്‍ ഒട്ടേറെ പുതിയ സംഘങ്ങള്‍ രൂപം കൊള്ളുകയുണ്ടായി. അതിലൊന്നാണ് ഒളവണ്ണ വനിതാ സൊസൈറ്റി. 2002 ജൂണ്‍ 28 നാണ്് ഈ സംഘം പ്രവര്‍ത്തനമാരംഭിച്ചത്. തുടങ്ങിയ സമയത്ത് 35 എ ക്ലാസ് അംഗങ്ങളാണ് ഉണ്ടായിരുന്നത്. ഇന്ന് എ ക്ലാസ് അംഗങ്ങള്‍ 287 ആണ്. സംഘം തുടങ്ങിയ കാലത്ത് എ ക്ലാസ് മെമ്പര്‍ഷിപ്പിന് നൂറ് രൂപയായിരുന്നു. ഇപ്പോഴിത് 500 രൂപയാണ്. സാധാരണക്കാരായ വീട്ടമ്മമാരാണ് സംഘത്തിലെ അംഗങ്ങള്‍.

സൊസൈറ്റിയുടെ തുടക്കത്തില്‍ ചീഫ് പ്രമോട്ടര്‍ സൗദാമിനി പി. ആയിരുന്നു. നാല് മാസത്തിനു ശേഷം തിരഞ്ഞെടുപ്പ് നടത്തി പി.പി. ഫൗസി, ജലജ പി.എന്‍ എന്നിവരെ യഥാക്രമം പ്രസിഡന്റ്, വൈസ്പ്രസിഡന്റ് പദവികളിലേക്ക് തിരഞ്ഞെടുത്തു. രണ്ട് വര്‍ഷവും പതിനൊന്ന് മാസവും ഫൗസിയ പ്രസിഡന്റായി തുടര്‍ന്നു. അതിനു ശേഷം ശോഭ ഇ.കെ., ഫിജിന ഷാജന്‍ , വീണ്ടും ജലജ പി.എന്‍.എന്നിവര്‍ പ്രസിഡന്റുമാരായി. 2017 ഒക്ടോബര്‍ മുതല്‍ ജലജ പ്രസിഡന്റ് സ്ഥാനം തുടരുകയാണ്. സൊസൈറ്റിയുടെ പ്രവര്‍ത്തനം എങ്ങനെയാവണം, നിക്ഷേപകരോട് എങ്ങനെ ഇടപെടണം തുടങ്ങി ഒട്ടേറെ സംശയങ്ങളും ആശങ്കകളും തുടക്കത്തില്‍ സൊസൈറ്റി അംഗങ്ങള്‍ക്കുണ്ടായിരുന്നു. പ്രമുഖ സഹകാരി സി.എന്‍. വിജയകൃഷ്ണനും കാലിക്കറ്റ് സിറ്റി സര്‍വീസ് കോ-ഓപ്പറേറ്റീവ് ബാങ്കിലെ ജീവനക്കാരുമാണ് ഇത്തരം ആശങ്കകള്‍ അകറ്റിയത്.

പുതിയ ശാഖയും വില്‍പ്പന സ്റ്റോറും

സംഘത്തിന് ഒരു ശാഖ ഉണ്ടായത് 2013 ആഗസ്റ്റ് 30നാണ്. മണക്കടവിലാണീ ശാഖ. പ്രവര്‍ത്തനം വൈവിധ്യവത്കരിക്കുന്നതിന്റെ ഭാഗമായാണ് എം.വി.ആര്‍ കാന്‍സര്‍ സെന്റര്‍ ആന്റ് റിസര്‍ച്ച് ഇന്‍സ്റ്റിറ്റ്യൂട്ടില്‍ 2017 മെയ് 15ന് സൊസൈറ്റി ഒരു വില്‍പ്പന സ്റ്റോര്‍ തുറന്നത്. ഇവിടത്തെ രോഗികള്‍ക്കാവശ്യമായ സാധനങ്ങള്‍ ഈ സ്റ്റോറില്‍ കിട്ടും.

വര്‍ക്കിങ് വിമന്‍സ് ഹോസ്റ്റലിന് പേര് നല്‍കിയിട്ടില്ല. അഞ്ച് നിലക്കെട്ടിടത്തില്‍ 21 മുറികളിലായി 110 പേര്‍ക്ക് താമസിക്കാനുള്ള സൗകര്യമായിരിക്കും സൊസൈറ്റി ഒരുക്കുക. ഹോസ്റ്റലില്‍ ഒരു വില്‍പ്പന സ്റ്റോറും സൊസൈറ്റിയുടെ ഒരു കൗണ്ടറും തുറക്കാന്‍ ഉദ്ദേശിക്കുന്നുണ്ട്. അന്യസംസ്ഥാനങ്ങളില്‍ നിന്നും കേരളത്തിലെ മറ്റ് ജില്ലകളില്‍ നിന്നും കോഴിക്കോട് നഗരത്തില്‍ ജോലിക്കെത്തുന്ന സ്ത്രീകള്‍ക്കും വിവിധ കോഴ്‌സുകള്‍ പഠിക്കാനെത്തുന്ന വിദ്യാര്‍ത്ഥിനികള്‍ക്കും സുരക്ഷിതമായ താമസസ്ഥലം. ഒളവണ്ണ വനിതാ സംഘം സ്വന്തമായി ഹോസ്റ്റല്‍ തുടങ്ങുന്നത് ഈ ലക്ഷ്യത്തോടെയാണ്.

നിക്ഷേപം, സ്വര്‍ണപ്പണയം, പേഴ്‌സണല്‍ ലോണ്‍, വാഹന വായ്പ തുടങ്ങിയ സേവനങ്ങള്‍ ബാങ്ക് ജനങ്ങള്‍ക്ക് കൊടുത്തു വരുന്നുണ്ട്. സ്ത്രീകള്‍ക്ക് മാത്രമാണ് നിലവില്‍ ബാങ്ക് ലോണ്‍ നല്‍കുന്നത്. സൊസൈറ്റി തുടങ്ങിയ കാലം മുതല്‍ ഇന്നുവരെ വാടകക്കെട്ടിടത്തിലാണ് പ്രവര്‍ത്തിക്കുന്നത്. സൊസൈറ്റി തുടങ്ങിയ സമയത്ത് ഡയരക്ടര്‍മാരും അംഗങ്ങളും ജനങ്ങളിലേക്ക് നേരിട്ട് ഇറങ്ങി പ്രവര്‍ത്തനങ്ങള്‍ വ്യാപിപ്പിച്ചു. സംഘത്തിന്റെ പ്രവര്‍ത്തനത്തെക്കുറിച്ച് നാട്ടുകാര്‍ക്കിടയില്‍ പ്രത്യേക ബോധവത്കരണം നടത്തി. സ്ത്രീകള്‍ മാത്രം പ്രവര്‍ത്തിക്കുന്ന സംഘമായതുകൊണ്ട് എല്ലാതരത്തിലുള്ള സഹായങ്ങള്‍ക്കും സ്ത്രീകള്‍ക്ക് ഏതു് സമയത്തും സൊസൈറ്റി സന്ദര്‍ശിക്കാന്‍ സാധിക്കും. 3565 എസ്.ബി. അക്കൗണ്ട്, 889 എഫ്.ഡി. അക്കൗണ്ട്, 2863 ഡെയിലി ഡെപ്പോസിറ്റ് അക്കൗണ്ട് തുടങ്ങിയ അക്കൗണ്ടുകളാണ് സൊസൈറ്റിയ്ക്കുള്ളത്. ഒമ്പത് കോടിയുടെ പ്രവര്‍ത്തന മൂലധനവും 18 സെന്റ് സ്ഥലവും സൊസൈറ്റിയ്ക്ക് ഇന്ന് സ്വന്തമായുണ്ട്.

ഒളവണ്ണ വനിതാ സഹകരണ സംഘം ഭരണ സമിതിയെഗങ്ങള്‍. ഇരിക്കുന്നവര്‍ ഇടത്തുനിന്ന്: പ്രജിതകുമാരി എം, സൗദാമിനി പി., പ്രസിഡന്റ് ജലജ പി.എന്‍, മിനി സുധാകരന്‍, ലത ആനന്ദന്‍. നില്‍ക്കുന്നവര്‍ ഇടത്തുനിന്ന്: ഫിജിന ഷാജന്‍, വൈസ് പ്രസിഡന്റ് രാജി കെ, സാജിത എന്‍, സുജാത രഘുനാഥ്

മൊബൈല്‍ ഫോണ്‍ വഴി പണം കൈമാറ്റം ചെയ്യുന്ന കാലഘട്ടം ആയതുകൊണ്ട് അത്തരത്തിലുള്ള മൊബൈയില്‍ ആപ്പ് തുടങ്ങാന്‍ സൊസൈറ്റി ആലോചിച്ച് വരുകയാണ്. എം.വി.ആര്‍ വില്‍പ്പന സ്റ്റോറില്‍ രണ്ട് ജീവനക്കാര്‍ ഷിഫ്റ്റ് അടിസ്ഥാനത്തില്‍ ജോലി ചെയ്യുന്നുണ്ട്. കൂടാതെ, ഏഴ് കളക്ഷന്‍ എജന്റ്മാരുമുണ്ട്. രാജി കെ. ( വൈസ് പ്രസിഡന്റ് ), സൗദാമിനി പി., മിനി സുധാകരന്‍, പ്രജിതകുമാരി എം, സാജിത അഷ്‌റഫ്, ലത ആനന്ദന്‍ ,സുജാത രഘുനാഥ്, ഫിജിന ഷാജന്‍ എന്നിവരാണ് മറ്റു ഭരണസമിതിയംഗങ്ങള്‍. സജിത എന്‍. ആണ് സംഘം സെക്രട്ടറി.

 

Read also
error: Content is protected !!