2021 സുസ്ഥിര സാങ്കേതികവിദ്യ കരുത്താര്‍ജിക്കും

Deepthi Vipin lal

– ഡോ. ടി. പി. സേതുമാധവന്‍

(2020 ഡിസംബര്‍ ലക്കം)

പതിവുപോലെ നമ്മള്‍ പുതുവര്‍ഷത്തെ പ്രതീക്ഷയോടെ വരവേല്‍ക്കാന്‍ ഒരുങ്ങുകയാണ്. പഠന, തൊഴില്‍ മേഖലകളില്‍ എന്തായിരിക്കും 2021 നമുക്കു വേണ്ടി കാത്തുവെക്കുന്നത് ?

കോവിഡ് 19 സൃഷ്ടിച്ച പ്രതിസന്ധിയില്‍ നിന്നു ലോകരാജ്യങ്ങള്‍ കരകയറാനൊരുങ്ങുമ്പോള്‍ ഏറെ പ്രതീക്ഷയോടെയാണ് 2021 നെ ഏവരും ഉറ്റുനോക്കുന്നത്. ഐക്യരാഷ്ട്ര സംഘടന 2021 അന്താരാഷ്ട്ര സമാധാനത്തിന്റെയും വിശ്വാസത്തിന്റെയും വര്‍ഷമായി പ്രഖ്യാപിച്ചിട്ടുണ്ട്. കൂടാതെ സുസ്ഥിര വികസനത്തിനുള്ള ക്രിയേറ്റീവ് സമ്പദ് വ്യവസ്ഥയുടെയും പഴം – പച്ചക്കറികളുടെയും അന്താരാഷ്ട്ര വര്‍ഷമായി ഐക്യരാഷ്ട്ര സംഘടന 2021 നെ പ്രഖ്യാപിച്ചിട്ടുണ്ട്. കൃത്രിമ ബുദ്ധി, റോബോട്ടിക്‌സ്, യന്ത്രവല്‍ക്കരണം, ഡ്രോണുകള്‍, വാഹനങ്ങളുടെ യന്ത്രവല്‍കരണം, 5 ജി കണക്ടിവിറ്റി, വിര്‍ച്വല്‍ ആന്റ് ആഗ്‌മെന്റഡ് റിയാലിറ്റി, ക്ലൗഡ് സേവനങ്ങള്‍ എന്നിവയില്‍ 2021 ല്‍ വന്‍ വളര്‍ച്ച പ്രതീക്ഷിക്കാം. ബിസിനസ് സാങ്കേതികവിദ്യയില്‍ ലോകത്ത് കൃത്രിമ ബുദ്ധി, സൈബര്‍ സെക്യൂരിറ്റി, ഇന്റര്‍നെറ്റ് അധിഷ്ഠിത സ്വഭാവം, ഓട്ടമേഷന്‍ എന്നിവ വന്‍ വളര്‍ച്ച കൈവരിക്കുമെന്നാണ് വിദ്യാഭ്യാസ, ഗവേഷണ, തൊഴില്‍ ഉപദേശക രംഗത്തെ അന്താരാഷ്ട്ര ഏജന്‍സിയായ ഗാര്‍ട്‌നറുടെ പ്രവചനം .

പുതുവര്‍ഷത്തില്‍ ഇന്ത്യയില്‍ 18-24 വയസ് പ്രായമുള്ളവരുടെ (Genzers) എണ്ണം മൂന്നിലൊന്നിലധികമാകും. കോവിഡ് പ്രതിസന്ധിയിലും വളര്‍ച്ച കൈവരിച്ച ആരോഗ്യ, വിദ്യാഭ്യാസ, ഭക്ഷ്യസംസ്‌കരണ മേഖലകള്‍ കൂടുതല്‍ കരുത്താര്‍ജിക്കും. തൊഴിലാളികള്‍ക്കും അഭ്യസ്തവിദ്യരായ യുവതീ യുവാക്കള്‍ക്കും തൊഴില്‍ കിട്ടാനും മികവിനും സ്‌കില്‍ വികസനം അത്യന്താപേക്ഷിതമായിത്തീരും. റീസ്‌കില്ലിങ്, അപ്പ്‌സ്‌കില്ലിങ് എന്നിവ വളര്‍ച്ച കൈവരിക്കും.

തൊഴിലുകള്‍ മാറുന്ന പ്രവണത കൂടും

ബിരുദം, ബിരുദാനന്തര പഠനം, ഗവേഷണം എന്നിവ ഒരേ വിഷയത്തില്‍ തുടരുന്ന രീതിയ്ക്ക് മാറ്റം വരും. തൊഴിലുകള്‍ മാറുന്ന പ്രവണത വര്‍ധിക്കും. മള്‍ട്ടി സ്‌കില്ലിങ്, പുത്തന്‍ ആശയങ്ങള്‍, ജീവിത സ്വഭാവങ്ങള്‍, ഇന്നവേഷന്‍ എന്നിവ ആവശ്യമായിത്തീരും. സംരംഭകത്വം, സ്റ്റാര്‍ട്ടപ്പുകള്‍ എന്നിവയില്‍ വളര്‍ച്ച പ്രതീക്ഷിക്കാം. കാര്‍ഷിക മേഖലയില്‍ സുസ്ഥിര വികസനത്തിനിണങ്ങിയ സ്റ്റാര്‍ട്ടപ്പുകള്‍ രൂപപ്പെടും. നേരിട്ടു കഴിക്കാവുന്നതും പാചകം ചെയ്യാവുന്നതുമായ റെഡി ടു ഈറ്റ്, റെഡി ടു കുക്ക് മേഖലയിലും ഇ-കൊമേഴ്‌സിലും സാധ്യതകളേറും.

2020 ലെ കടുത്ത സാമ്പത്തിക മാന്ദ്യത്തിനുശേഷം 2021 ല്‍ സമ്പദ്‌വ്യവസ്ഥ വളര്‍ച്ച കൈവരിക്കും. മാനേജ്‌മെന്റ്, ബിസിനസ്, വ്യാപാര മേഖലകളില്‍ ഇത് പ്രകടമാകും. തൊഴിലാളികള്‍ ഇപ്പോഴത്തെ Comfort Zone ( ആശ്വാസകരമായ രീതിയില്‍ ) ല്‍ നിന്നു പുത്തന്‍ രീതികളിലേക്ക് മാറേണ്ടിവരും. വര്‍ക്ക് ഫ്രം ഹോം രീതി തുടരും.

ദേശീയ വിദ്യാഭ്യാസം നടപ്പാക്കുന്നതോടെ പൊതു / ഉന്നത വിദ്യാഭ്യാസ മേഖലയില്‍ ഭാഷാ പഠനം, സ്‌കില്‍ വികസനം എന്നിവയില്‍ മാറ്റങ്ങളുണ്ടാകും. ഇന്റര്‍ ഡിസിപ്ലിനറി ഗവേഷണം, റെഗുലേറ്ററി സിസ്റ്റം, പൊതു പരീക്ഷകള്‍, വിദേശ സര്‍വ്വകലാശാലകളുമായി ചേര്‍ന്നുള്ള ട്വിനിങ് കോഴ്‌സുകള്‍, കോളേജുകളുടെ സ്വയംഭരണാവകാശം എന്നിവയില്‍ മാറ്റം പ്രതീക്ഷിക്കാം. ഡിജിറ്റല്‍ സാങ്കേതികവിദ്യ വന്‍ വളര്‍ച്ച കൈവരിക്കും.

അമേരിക്കയില്‍ ജോ ബൈഡന്‍ പ്രസിഡന്റാകുന്നതോടെ സയന്‍സ്, ടെക്‌നോളജി, എന്‍ജിനിയറിങ്, മാത്തമാറ്റിക്‌സ്, സ്‌കില്‍ വികസനം, ഗവേഷണ പ്രോഗ്രാമുകള്‍ എന്നിവ കരുത്താര്‍ജിക്കും. H1 B വിസയ്ക്ക ്കൂടുതല്‍ ഇന്ത്യക്കാര്‍ അര്‍ഹത നേടും. ചൈന, ജപ്പാന്‍, യൂറോപ ്യന്‍ രാജ്യങ്ങള്‍ എന്നിവിടങ്ങളില്‍ മാന്ദ്യം തുടരും. യു.കെ., അമേരിക്ക, ന്യൂസിലാന്റ്, കാനഡ, ആസ്‌ട്രേലിയ തുടങ്ങിയ രാജ്യങ്ങളില്‍ ഉപരിപഠനത്തിനെത്തുന്ന വിദ്യാര്‍ഥികളുടെ എണ്ണം വര്‍ധിക്കും.

ഡാറ്റാ സയന്‍സ്, റോബോട്ടിക്‌സ്, മെഷീന്‍ ലേണിങ്, ഐ.ഒ.ടി. ഡാറ്റ അനലിറ്റിക്‌സ്, ഡിജിറ്റല്‍ മീഡിയ എന്നിവ വളര്‍ച്ച കൈവരിക്കും. ബയോമെഡിക്കല്‍ എന്‍ജിനിയറിങ്, 3 D പ്രിന്റിങ്, സെന്‍സറുകള്‍ എന്നിവയില്‍ വന്‍ വളര്‍ച്ച പ്രതീക്ഷിക്കാം. മാനുഫാക്ചറിങ് മേഖലയില്‍ കൂടുതല്‍ തൊഴിലവസരങ്ങള്‍ സൃഷ്ടിക്കപ്പെടും. ഇലക്‌ട്രോണിക്‌സ്, ഐ.ടി. എന്നിവയില്‍ ഇത് പ്രകടമാവും. ഇക്കണോമിക്‌സ്, ഡെവലപ്‌മെന്റല്‍ സയന്‍സ്, ഓട്ടോമൊബൈല്‍ എന്‍ജിനിയറിങ്, എനര്‍ജി എന്‍വിറോണ്‍മെന്റല്‍ എന്‍ജിനിയറിങ് , ആര്‍ക്കിടെക്ചര്‍, കമ്യൂണിക്കേഷന്‍, മെക്കാനിക്കല്‍, കമ്പ്യൂട്ടര്‍ സയന്‍സ്, ഹെല്‍ത്ത് ആന്റ് ന്യൂട്രീഷന്‍, കുലിനറി ആര്‍ട്‌സ് എന്നിവയ്ക്ക് ആവശ്യക്കാരേറും.

ഹോസ്പിറ്റാലിറ്റി, ടൂറിസം മേഖലയില്‍ മാന്ദ്യം തുടരും. ആക്ച്വറിയല്‍ സയന്‍സ്, അക്കൗണ്ടിങ് കോഴ്‌സുകള്‍, ആര്‍ട് ആന്റ് ഡിസൈന്‍, സൈബര്‍ സെക്യൂരിറ്റി, ഫാഷന്‍ ഡിസൈന്‍ എന്നിവയില്‍ കൂടുതല്‍ തൊഴിലവസരങ്ങള്‍ രൂപപ്പെടും.

അമേരിക്കയില്‍ പഠിയ്ക്കാം

ഉന്നത വിദ്യാഭ്യാസ മേഖലയില്‍ മികച്ച അവസരങ്ങളാണ് അമേരിക്കന്‍ വിദ്യാഭ്യാസ സ്ഥാപനങ്ങള്‍ ഉറപ്പു വരുത്തുന്നത്. കോഴ്‌സിന്റെ കാലയളവ്, വിദ്യാര്‍ഥികളുടെ താല്‍പര്യത്തിനിണങ്ങിയ കോഴ്‌സുകള്‍, സാങ്കേതിക മികവ്, സാമ്പത്തിക സഹായം, പാര്‍ടൈം തൊഴിലുകള്‍ തുടങ്ങിയവ അമേരിക്കയില്‍ പഠിയ്ക്കാനുള്ള ആകര്‍ഷണങ്ങളില്‍പ്പെടും. അമേരിക്കയിലെ 10 ലക്ഷം വിദേശ വിദ്യാര്‍ഥികളില്‍ രണ്ട് ലക്ഷത്തിലേറെയും ഇന്ത്യയില്‍ നിന്നാണ്. ആറ് അമേരിക്കന്‍ വിദ്യാര്‍ഥികളില്‍ ഒരു ഇന്ത്യന്‍ വിദ്യാര്‍ഥിയുണ്ടാകും.

എപ്പോള്‍ തയാറെടുക്കാം ?

പ്ലസ് ടു വിനു ശേഷം അമേരിക്കയില്‍ അണ്ടര്‍ ഗ്രാഡുവേറ്റ് പ്രോഗ്രാമിന് പഠിയ്ക്കാനാഗ്രഹിക്കുന്ന വിദ്യാര്‍ഥികള്‍ പ്ലസ് ടുവിന് പഠിയ്ക്കുമ്പോള്‍ത്തന്നെ തയാറെടുക്കണം. ഒമ്പതാം ക്ലാസു മുതല്‍ പ്ലസ് വണ്‍ വരെയുള്ള മാര്‍ക്കുകള്‍ വിലയിരുത്തും. ഇതനുസരിച്ച് പ്ലസ് ടുവിനു ലഭിയ്ക്കാവുന്ന മാര്‍ക്കുകളെക്കുറിച്ച് വിലയിരുത്താം. അതിനാല്‍ പ്ലസ് ടു ബോര്‍ഡ് പരീക്ഷയ്ക്ക് മുമ്പുതന്നെ അമേരിക്കയിലെ കോളേജുകളില്‍ അണ്ടര്‍ഗ്രാഡുവേറ്റ് പ്രോഗ്രാമിന് അഡ്മിഷന്‍ നേടാം. ഇതിനായി SAT, TOEFL / IELTS പരീക്ഷകള്‍ ഉയര്‍ന്ന സ്‌കോറോടെ പൂര്‍ത്തിയാക്കണം. SAT ല്‍ SAT- 1, SAT 2 എന്നിങ്ങനെ രണ്ട് പേപ്പറുകളുണ്ടാകും. SAT നു പകരം ACT- American College Test – മതിയാകും.

മികച്ച അഞ്ചെട്ടു സ്ഥാപനങ്ങളില്‍ അപേക്ഷിക്കണം. അക്കാദമിക് മികവ്, പ്രാവീണ്യ പരീക്ഷാ സ്‌കോറുകള്‍ എന്നിവയ്ക്ക് അഡ്മിഷനില്‍ മുന്‍ഗണന ലഭിക്കും. ഇന്ത്യയിലെ ബിരുദ പ്രോഗ്രാം അമേരിക്കയില്‍ അണ്ടര്‍ ഗ്രാഡുവേറ്റ് പ്രോഗ്രാമായാണ് കണക്കാക്കുന്നത്. ഇന്ത്യയില്‍ നിന്നു ബിരുദം പൂര്‍ത്തിയാക്കി അമേരിക്കയില്‍ ഗ്രാഡുവേറ്റ് ( ഇന്ത്യയിലെ പി.ജി. ) പ്രോഗ്രാമിന് പോകാന്‍ താല്‍പ്പര്യപ്പെടുന്നവര്‍ കുറഞ്ഞത് നാലു വര്‍ഷത്തെ ബിരുദം പൂര്‍ത്തിയാക്കണം. എന്നാല്‍, ഇന്ത്യയിലെ ബി.എ., ബി.എസ്‌സി, ബി.കോം. തുടങ്ങിയ മൂന്നു വര്‍ഷ ബിരുദം പൂര്‍ത്തിയാക്കിയവര്‍ NAC A / B അക്രഡിറ്റേഷനുള്ള സ്ഥാപനത്തില്‍ നിന്നു കോഴ്‌സ് പൂര്‍ത്തിയാക്കിയിരിക്കണം. 70 ശതമാനം മാര്‍ക്കെങ്കിലും ബിരുദതലത്തില്‍ ലഭിച്ചിരിക്കണം. മറ്റുള്ളവര്‍ക്ക് ഒരു വര്‍ഷത്തെ കോഴ്‌സുകളോ ബിരുദാനന്തര പഠനമോ പൂര്‍ത്തിയാക്കിയ ശേഷം അഡ്മിഷനു ശ്രമിക്കാം. ഇവര്‍ക്ക് കേംബ്രിഡ്ജ് ഇംഗ്ലീഷിന്റെ CEPT, Lingua skill പ്രോഗ്രാമുകള്‍ ചെയ്യാവുന്നതാണ്.

എപ്പോള്‍ തുടങ്ങും ?

അമേരിക്കയില്‍ ജനുവരി ( സ്പ്രിങ് ) , ആഗസ്ത് – സെപ്റ്റംബര്‍ ( ഫാള്‍ ) സീസണില്‍ സെമസ്റ്റര്‍ ആരംഭിക്കും. ബിരുദാനന്തര ബിരുദം ഒരു വര്‍ഷം മുതല്‍ രണ്ടു വര്‍ഷം വരെ നീളും. ആക്‌സിലറേറ്റഡ് പ്രോഗ്രാമിലൂടെ കുറഞ്ഞ കാലയളവില്‍ 8-10 മാസങ്ങള്‍ കൊണ്ട് കോഴ്‌സ് പൂര്‍ത്തിയാക്കാം.

സയന്‍സ്, ടെക്‌നോളജി, എന്‍ജിനിയറിങ് , മാത്തമാറ്റിക്‌സ് എന്നിവയുള്‍പ്പെട്ട STEM വിഷയങ്ങള്‍ക്കാണ് സാധ്യതയേറെ. ഹ്യുമാനിറ്റീസ്, മാനേജ്‌മെന്റ്, ബിസിനസ് സ്റ്റഡീസ്, മെഡിസിന്‍, ഡെന്റല്‍, വെറ്ററിനറി, ഇക്കണോമിക്‌സ്, നിയമം എന്നിവയ്ക്കും സാധ്യതയേറുന്നു. എന്നാല്‍, STEM കോഴ്‌സുകള്‍ക്ക് സാധ്യതയേറിയതിനാല്‍ STEM അല്ലാത്ത കോഴ്‌സുകള്‍, സയന്‍സ്, ടെക്‌നോളജി, എന്‍ജിനിയറിങ്, മാത്തമാറ്റിക്‌സ്, ഡാറ്റ അനലിറ്റിക്‌സ് മേഖലയിലുള്‍പ്പെടുത്തി പോസ്റ്റ് സ്റ്റഡി വര്‍ക്ക് വിസ 36 മാസം വരെ അനുവദിച്ചുവരുന്നു. മാനേജ്‌മെന്റ്, ഇക്കണോമിക്‌സ്, ബിസിനസ് സ്റ്റഡീസ് കോഴ്‌സുകള്‍ ഈ രീതിയിലേക്ക് പരിഗണിച്ചുവരുന്നു.

പഠന കാലയളവില്‍ പൊതു, സ്വകാര്യ സര്‍വ്വകലാശാലകളില്‍ നിരവധി സ്‌കോളര്‍ഷിപ്പ്, ഫെല്ലോഷിപ്പ് എന്‍ഡോവ്‌മെന്റുകളുണ്ട്. അസിസ്റ്റന്റ് ഷിപ്പും പാര്‍ടൈം തൊഴിലുകളുമുണ്ട്. കോഴ്‌സ് പൂര്‍ത്തിയാക്കിയവര്‍ക്ക് ഒരു വര്‍ഷത്തെ OPT- Optional Practical Training – ഉണ്ട്. തുടര്‍ന്ന് STEM കോഴ്‌സ് പൂര്‍ത്തിയാക്കിയവര്‍ക്ക് 24 മാസംവരെ പോസ്റ്റ് സ്റ്റഡി വര്‍ക്ക്‌വിസ ലഭിക്കും. മൊത്തം 36 മാസത്തെ പോസ്റ്റ് സ്റ്റഡി വര്‍ക്ക്‌വിസ കിട്ടും. അമേരിക്കയിലെ ഉപരിപഠനത്തിന് 18 മാസം മുമ്പ് തയാറെടുപ്പു തുടങ്ങണം. ആദ്യത്തെ ആറു മാസം താല്‍പര്യത്തിനിണങ്ങിയ കോഴ്‌സുകള്‍, സ്ഥാപനങ്ങള്‍ എന്നിവ കണ്ടെത്താന്‍ ശ്രമിക്കണം. രക്ഷിതാവിന്റെ സാമ്പത്തിക നിലവാരം വിലയിരുത്തണം. അപേക്ഷ സമര്‍പ്പിക്കുന്നതോടൊപ്പം ആവശ്യമായ ടെസ്റ്റുകള്‍ പൂര്‍ത്തിയാക്കണം. ഗ്രാഡുവേറ്റ് പ്രോഗ്രാമിന് GRE, TOEFL എന്നിവയും മാനേജ്‌മെന്റ് പഠനത്തിന് GMAT, TOEFL / IELTS സ്‌കോറുകളും ആവശ്യമാണ്.

അഡ്മിഷന്‍ ലഭിച്ചാല്‍ സ്റ്റൂഡന്റ് വിസയ്ക്കുള്ള നടപടികളാരംഭിക്കണം. ഈ കാലയളവില്‍ സാമ്പത്തിക സ്രോതസ്സിനുള്ള അന്വേഷണം ( സ്‌കോളര്‍ഷിപ്പ് / ഫെല്ലോഷിപ്പ് / അസിസ്റ്റന്റ്ഷിപ്പ് ) തുടരാം. അപേക്ഷയോടൊപ്പം അക്കാദമിക്ക് മാര്‍ക്ക് ലിസ്റ്റ്, ട്രാന്‍സ്‌ക്രിപ്റ്റ് ടെസ്റ്റ് സ്‌കോര്‍ എന്നിവയുടെ കോപ്പികള്‍, സ്റ്റേറ്റ്‌മെന്റ് ഓഫ് പര്‍പ്പസ്, ശുപാര്‍ശക്കത്തുകള്‍, ബയോഡാറ്റ, സാമ്പത്തിക സ്രോതസ്സിനുള്ള തെളിവ് എന്നിവ ആവശ്യമാണ്. മെഡിക്കല്‍ പഠനം ആഗ്രഹിക്കുന്നവര്‍ക്ക് പ്ലസ് ടു വിനോടൊപ്പം SAT / ACT, TOEFL സ്‌കോറുകള്‍ വേണം. അവര്‍ക്ക് നാലു വര്‍ഷത്തെ പ്രീ മെഡിക്കല്‍ കോഴ്‌സിനു ചേരാം. തുടര്‍ന്ന് MCAT- മെഡിക്കല്‍ കോളേജ് അഡ്മിഷന്‍ ടെസ്റ്റ് – പൂര്‍ത്തിയാക്കി മെഡിക്കല്‍ സ്‌കൂളില്‍ അഡ്മിഷന്‍ നേടാം.

ഓരോ സര്‍വ്വകലാശാലയിലും അഡ്മിഷന്‍ തീയതികളിലും നടപടി ക്രമങ്ങളിലും മാറ്റമുണ്ടാകും. പ്രവേശനം ലഭിച്ചാല്‍ വിദ്യാര്‍ഥികള്‍ക്ക് സര്‍ട്ടിഫിക്കറ്റ് ലഭിയ്ക്കും. ഇവര്‍ക്ക് എ 1 സ്റ്റുഡന്റ് വിസയ്ക്ക് അപേക്ഷിക്കാം. സാമ്പത്തിക സഹായം , ടീച്ചിങ് അസിസ്റ്റന്റ്ഷിപ്പ്, ഗ്രാഡുവേറ്റ് അസിസ്റ്റന്റ്ഷിപ്പ്, റിസര്‍ച്ച് അസിസ്റ്റന്റ്ഷിപ്പ് പ്രോഗ്രാമുകള്‍ക്ക് അപേക്ഷിക്കാം. പ്രവേശന സാധ്യത നിരവധി കാര്യങ്ങളെ ആശ്രയിച്ചിരിക്കുന്നു. അക്കാദമിക് മികവ് ടെസ്റ്റ്, ടെസ്റ്റ് സ്‌കോറുകള്‍, ശുപാര്‍ശക്കത്തുകള്‍, അധ്യാപന പരിചയം എന്നിവ ഇതിനുപകരിക്കും. യുണൈറ്റഡ് സ്റ്റേറ്റ്‌സ് ഇന്ത്യ എഡ്യുക്കേഷന്‍ ഫൗണ്ടേഷന്‍ ( USIEF ) അമേരിക്കന്‍ വിദ്യാഭ്യാസത്തെക്കുറിച്ച് വിദ്യാര്‍ഥികള്‍ക്ക് വ്യക്തമായ വിവരങ്ങള്‍ നല്‍കിവരുന്നു. USIEF ന് ചെന്നൈയില്‍ ഓഫീസുണ്ട്. www.usief.org.in, www.educationusa.state.gov

സ്‌കോളര്‍ഷിപ്പുകള്‍ / ഫെല്ലോഷിപ്പുകള്‍ എന്നിവയെക്കുറിച്ചുള്ള കൂടുതല്‍ വിവരങ്ങള്‍ വെബ്‌സൈറ്റില്‍ ലഭിക്കും. പ്രധാനപ്പെട്ട വെബ്‌സൈറ്റുകള്‍: യൂണിവേഴ്‌സിറ്റികളെ കണ്ടെത്താന്‍ – www.petersons.com, www.gradschools.com, www.edupass.org, www.carnegieclassifications.in.edu, www.mup.umass.edu അക്രഡിറ്റേഷന്‍ നിലവാരമറിയാന്‍ : www.ope.ed.gov, www.studyinthestates.dhs.gov. സാമ്പത്തികം: www.fundingusstudy.org , www.finaid.org , GRE- www.ets.org/gre , GMAT – www.gmac.com ,TOEFL – www.toefl.org, www.ielts.org. സ്റ്റൂഡന്റ് വിസ: www.inusembassy.gov, www.ustravelsdoes.com. യാത്രാ തയാറെടുപ്പുകള്‍: www.educationusa.state.gov, www.usief.org.in

പി.എച്ച്ഡി. പൂര്‍ത്തിയാക്കിയവര്‍ക്ക് പോസ്റ്റ് സ്റ്റഡി ഗവേഷണത്തിന് അപേക്ഷിക്കാം. ഇതിന് GRE, TOEFL ടെസ്റ്റുകള്‍ ആവശ്യമില്ല. ഗവേഷണത്തോടൊപ്പം ഫെല്ലോഷിപ്പും ലഭിക്കും.

Leave a Reply

Your email address will not be published.

Latest News